Երևանի կենդանաբանական այգու պատմությունը սկիզբ է առնում 1940-ականներից։ Տասնամյակների ընթացքում այն շարունակաբար զարգացել և բարեփոխվել է՝ դառնալով մայրաքաղաքի սիրված կրթական, ժամանցային և հանգստի վայրերից մեկը։
Այսօր այգին տուն է ավելի քան 160 կենդանատեսակի համար։ Դրանց զգալի մասն ընդգրկված է Բնության պահպանության միջազգային միության Կարմիր ցուցակում և Հայաստանի Հանրապետության կենդանիների Կարմիր գրքում, ընդգծելով այգու կարևոր բնապահպանական և գիտակրթական դեր։
Լինելով բնապահպանական կառույց՝ կենդանաբանական այգին իր գործունեության հիմքում դնում է կենսաբազմազանության պահպանումը։ Այստեղ իրականացվում են վտանգված տեսակների պահպանության, բազմացման և հանրային իրազեկման աշխատանքներ՝ միտված կենդանիների բարեկեցության բարձրացմանը։
Առանձնահատուկ ուշադրություն է դարձվում տարածաշրջանային՝ հատկապես Հայկական լեռնաշխարհի և Կովկասի կենսաբազմազանությանը բնորոշ վտանգված տեսակներին։ Դրանցից հայկական մուֆլոնը դարձել է այգու խորհրդանիշ՝ արտացոլվելով տարբերանշանում և մարմնավորելով մշակույթ – բնություն ներդաշնակ փոխկապակցվածությունը։
Այսօր Երևանի կենդանաբանական այգին պարզապես կենդանիների ցուցադրության վայր չէ։ Այն կրթական, գիտական և բնապահպանական կենտրոն է, որտեղ յուրաքանչյուր այց օգնում է ավելի լավ ճանաչել բնությունը և հասկանալ դրա պահպանության կարևորությունը։