Երևանի կենդանաբանական այգին, հետևելով ժամանակակից այգիների գաղափարախոսությանը, հետապնդում է չորս հիմնական նպատակ՝ բնապահպանական, կրթական և լուսավորչական, հետազոտական աշխատանքների իրագործման և քաղաքացիների հանգստի կազմակերպման:

Բնապահպանական նպատակի շրջանակներում Երևանի կենդանաբանական այգին իրականացնում է Բնության պահպանության միջազգային միության կարմիր ցուցակում և ՀՀ կենդանիների Կարմիր գրքում ընդգրկված մի շարք կենդանատեսակների անազատ պայմաններում (ex-situ) բազմացման ծրագրեր՝ դրանց շրջանակներում համագործակցելով ՀՀ շրջակա միջավայրի նախարարության,  ՀՀ ԳԱԱ կենդանաբանության և հիդրոէկոլոգիայի գիտական կենտրոնի և միջազգային բնապահպանական կառույցների՝ Բնության համաշխարհային հիմնադրամի Հայաստանյան մանաճյուղի (WWF), Կովկասյան բնության հիմնադրամի (CNF), Գերմանիայի բնության պահպանության միության Հայաստանյան մասնաճյուղի (NABU), ինչպես նաև մի շարք կենդանաբանական այգիների հետ: Իրականացվող ծրագրերում առանձնակի ուշադրություն է դարձվում վտանգված տեսակների պահպանության խնդիրների վերհանման կարևորությանը հասարակության շրջանում: Մինչ այժմ իրականացված ծրագրերից առանձնակի կարևորություն ունեն ՀՀ կենդանիների Կարմիր գրքում ընդգրկված մորուքավոր անգղի և հայկական մուֆլոնի բազմացման ծրագրերը:

Գիտակրթական ծրագրերի շրջանակում Երևանի կենդանաբանական այգին համագործակցում է մի շարք ուսումնական հաստատությունների հետ, որոնցից են Երևանի պետական համալսարանը, Խ. Աբովյանի անվան հայկական պետական մանկավարժական համալսարանը, Հայաստանի ազգային ագրարային համալսարանը, Երևանի Փ. Թերլեմեզյանի անվան գեղարվեստի պետական քոլեջը, Ա.Շիրակացու  անվան ճեմարանը և այլ կրթական կենտրոններ:

Երևանի կենդանաբանական այգու տարբերանշանի վրա պատկերված են հայկական մուֆլոնի (հայկական վայրի խոյի) եղջյուրները և այգու հայերենատառ անվանումը:

Հայկական մուֆլոնը, ինչպես հուշում է նրա անվանումը, Հայկական բարձրավանդակի էնդեմիկ տեսակ է: Այն հայ ժողովրդի համար պատմականորեն հանդիսացել է տոտեմային կենդանի: Ուստի պատահական չէ, որ հայկական մուֆլոնն իր արտացոլումն է գտել հայկական մշակութային այնպիսի ոլորտներում, ինչպիսիք են  ճարտարապետությունը և մանրանկարչությունը, այն նաև հանդիպում է մի շարք տեղանուններում և տոհմանուններում:

Հայկական մուֆլոնը մեծ արժեք է ներկայացնում նաև բնապահպանական տեսանկյունց: Այս տեսակը գրանցված է ՀՀ կենդանիների Կարմիր գրքում՝ որպես վտանգված և բնության մեջ վերացման եզրին գտնվող կենդանատեսակ: Այդ իսկ պատճառով հայկական մուֆլոնը Երևանի կենդանաբանական այգու համար հանդիսանում է բազմացան և պահպանության թիրախային կենդանատեսակ:

Այս ամենն էլ հիմք է հանդիսացել հայկական մուֆլոնին ընտրել որպես Երևանի կենդանաբանական այգու խորհրդանիշ: